40 tan oo hub oo nooc kasta leh, kuna jiraan madaafiic iyo hoobiyeyaal casri ah iyo qoryaha darandooriga u dhaca iyo waliba ookiyaalayaal habeenkii wax lagu arko ayaa waxaa DKMG ah u keeney Maraykanka, shixnadani hub ayaa waxaa keeney markab kusoo xirtey dekeda weyn.

Waxaa xigey dayuurad qaas ah oo siddey lacag cadaan ah oo lagu sheegey in ay ka badantahay $10 milyan oo doolar, lacagtani ayaa markiiba la bilaabay isticmaalkeeda iyadoo mushaar ahaan loo siinayo howlwadeenada dagaalka iyo maleeshiyaadka dowlada u dagaalamaya.

Ma ahan kuwa Xamar ka dagaalamaya oo kaliya dadka wax ka helaya hubka iyo lacagta ee sidoo kale waxaa qeyb ku leh maleeshiyaadka maxaakiimta ee Hiiraan iyo kuwa Ahlu Sunna ee gobolada dhexe.

Wali waxa ay dowlada ku mashquulsantahay kala qeeybinta iyo meeleynta hubka iyo lacagta, iyadoo gorgortan kula jirta beelo ay dooneyso in ay lacag ku siiso la dagaalanka muqaawamada .

Kadib waxaa la filayaa in ay qaado dagaalo qorsheysan oo ay la gasho xoogaga muqaawamada.

Maraykanka horey ayuu lacag malaayiin doolar ah ku bixiyey sidani oo kale sanadii 2005tii xiligaasi oo uu siiyey hogamaye kooxeedyadii arxanka darnaa si ay ula dagaalaan waxa uu ugu yereo argagixisada, waxaa xusid mudan in lacagtaasi dadkii loo adeegsaday uu madax u ahaa Shariif SH. Axmed oo ah madaxweynaha dowlada hadda lacagtani la siinayo iyadoo ujeedku uu yahay isla kii shalay.

Ka hor intii aanan lacagtani iyo hubkani loo geeynin  waxaa Shariifka taleefon kusoo wacday haweeneyda wasiirka arrimaha dibbada ka ah Maraykanka Hillary  Clinton oo la sheegey in ay kala tashatay arrinta.

Maraykanka waxaa la sheegey in sidoo kale malaayiin kale uu siinayo dowlada Uganda, Kenya iyo Burundi si ay u tabobaraan ciidamada DKMG ah, waxaa kale oo uu DKMG ah ku saacidayaa xagga gaadiidka ciidamada iyo isgaarsiinta.

Xogtani waxaa warfidiyeeno Washington jooga u sheegey sargaal sare oo ka tirsan wasaarada arrimaha dibbada, balse codsaday in magaciisa la qariyo, wuxuu sheegey in maraykanku doonayo in uu cirib tirro waxa uu ugu yeero argagixisada .

Dhanka muqaawamada wali kama aysan hadlin arrintani, indhaha ayayna ku hayaan . Lama oga sida ay arrintani gacan u siin doonto DKMG ah dagaalka ay kula jirto xoogaga muqaawamada ee doonaya in ay meesha ka saaraan.